Dieđut

Orrunsadji: Eará guovlluid oahppit geat dárbbašit orrunsaji fertejit farggamusat váldit oktavuođa skuvllain. Skuvllas lea verddebearašortnet mii sihkkarastá oadjebas ja hálbbes orrunfálaldaga.

Tuvrabeaivi: Lea plánejuvvon tuvrabeaivvi buot oahppiide skuvlajagi álggus. Danne lea dehálaš ahte eará guovllu oahppit váldet mielde bivuid/meahccebiktasiid ja eará tuvrabiergasiid. 

Diehtojuohkkin čoahkkin: Skuvla bovde dasa lassin eará guovllu ohppiid ja sin váhnemiid diehtojuohkinčoahkkimii sotnabeaivi 18.08.24 dii. 18.00-19.30 kantiinnas. Guossohat nisoláibbážiid, káfe, teaja ja sávtta.

Oahppiidgirjjáš: Skuvla lea ráhkadan oahppigirjjáža mas sáhtát gávdnat ollu ávkkálaš dieđuid skuvlla birra ja mo lea oahppin leat. Girjjáža oaččot vuosttas skuvlavahkku gulahallanoahpaheaddjis, geahča maid liŋkka bajábealde dán siiddus.

Oahppidieđut: Deavdde skovi “Oahppidieđut” – sádde dan skuvlii dahje váldde dan mielde vuosttas skuvlabeaivvi. Atte dan iežat gulahallanoahpaheaddjái dahje buvtte dan skuvlla ovdakantuvrii. Lea dehálaš ahte skuvllas leat dát dieđut du birra.

Dihtor: Fuomášuhtán vel ođđa ohppiide ahte dis galgá dihtor mielde vuosttas skuvlabeaivvi. Skuvla fállá jo1 ohppiide oastit hálbbiduvvon čibbedihtora skuvlla oahppi-pc ortnega bokte. Lea sierra čálus dán birra. Eaktun dasa lea ahte oastibehtet dihtora min neahttauskkádaga bokte. Lohkket dárkilit mildosa dihtoroastima birra.

Bures boahtin ođđa skuvlajahkái!

Dearvuođaiguin

Susann Røkke
rektor