Goappašat gánddat leaba min skuvlla ovddeš oahppit, ja lei hirbmat fiinna lunšakonsearta oahppiide ja bargiide. Oktasaš juoigan ja lávlun gullui miehtá skuvlla, go gándda guoktá rohttiiga sihke Party-luođi ja Hjerteknuser:a.

Konseartta maŋŋá lei áigi “soffá-ságastallamii” mas gándda guoktá vástideigga oahppiid jearaldagaide. Soai muitaleigga ee. iežaska vásáhusaid birra ja mo sámi musihkka ja luohti leamašan dehálaččat ovddidan dihte sámegiela ja -kultuvrra. Ollu giitu somás vásáhusas! Mii leimmet buohkat erenomáš duhtavaččat.

 

Sámi giellavahku birra
Giellavahku ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servodagas. Juste dán vahkus galget sámegielat gullot ja oidnot juohke sajis. Sámegielat lat áitejuvvon gielat, ja danne leage dehálaš ahte sámegiella gullo ja oidno buot arenain.

Giellavahkus lea sierra neahttasiidu, mas gávdná prográmma, resurssaid ja dieđuid giellavahku birra. 
Loga: Giellavahkku

Mii lea luohti?
Luohti lea sámiid árbevirolaš nuohtta dahje šuokŋa, ja juoigat lea sámiid árbevirolaš vuohki ovdanbuktit nuohtaid, mii lea earálágan go dábálaš lávlagat ja lávlun. Juoiganárbevierru lea dološ árbevierru, ja árvvoštallojuvvo ahte juoigan lea okta dain boarráseamos nuhttenárbevieruin Eurohpás.

Iešguđetlágan luođit
Mis leat iešguđetlágan luođit, ja dán áiggi mii earuhit gaskkal olbmo-, ealli- ja luondduluđiid.

Olbmoluohti lea persovnnalaš luohti, dávjá oktan dajahusain, mii lea dihto olbmui ráhkaduvvon. Olbmoluođit dábálaččat govvidit dušše buriid beliid olbmos. Go olmmoš gullá iežas luođi, de lea dego muhtin livččii rábmomin su, ja son šaddá buoremillii. Ealliluohti govvida dihto ealli mihtilmasvuođaid. Nu go mo dat ealli lihkada, ja lea go stuoris vai unni, ja nu ain. Luondduluođit sáhttet govvidit vári, orohaga, dahje jahkemolsuma nu go ovdamearkka dihte galbma giđđadálvvi.

Dábálaččat mii dadjat ahte juoigi juoigá ovtta objeavtta. Mii dadjat ahte son juoigá olbmo, ealli dahje báikki, ii ge ahte son juoigá muhtima dahje juoga man birra.

Gáldu: Davvi álbmogat

Govven Ravna Aslaksdatter ja Mette Anti