Njukčamánu 18.-19. beivviid lágidii Ungt Entreprenørskap Arktis fylkkameašttirgilvvuid Finnmárkku ja Tromssa nuoraidfitnodagaid várás. Badjel 80 nuoraidfitnodaga serve gilvvuide, ja maiddái min skuvllas ledje fitnodagat searvan.
Vuite videoin
Gilvvus leat iešguđet luohkát gos nuoraidfitnodagat sáhttet gilvvohallat.
Min medialinjá nuoraidfitnodat, Punktum Media UB, lei earret eará searvan "Buoremus videopitch" gilvui, iežaset videoin, ja vuite dán luohkás buot eará nuoraidfitnodagaid vuostá.
Lei somá oassálastit gilvvuin ja erenoamáš somá vuoitit! Eat lean vuordán dan vaikke leimmet olu bargan dáinna, lohká Eva-Liisa Nystad Leithe, guhte lea okta ohppiin Punktum Media nuoraidfitnodagas.
Illu&Mokta UB, geat vázzet mánáid- ja nuoraidbargilinjás, ges gárte goalmmádin "buoremus ekonomiijahálddašeapmi" luohkás.
Skuvlla bealis sávvat olu lihkku vuitiide ja buot min fitnodagaide ain lihkku fitnodatdoaimmaiguin.
Govat: Illu&Mokta ja Berit Marie Lise Eira
