Duorastaga ođđajagimánu 15. beaivvi čađahii Sámi joatkkaskuvla Kárášjogas jahkásaš lágideami, Rabas beaivi, rekrutteret ohppiid lagasbirrasis min skuvlii.
Min oahppit leat Rabas beaivvi lágideaddjit, ja sii plánejit ja čađahit doaimmaid mat čájehit skuvlla fálaldagaid vejolaš ođđa ohppiide.
Guossit ledje hui duhtavaččat, ja sin mielas leat min oahppit hui čeahpit muitalit iežaset fágaid birra ja čađahit doaimmaid ohppiide geat bohtet, vai sii oahpásmuvvet min skuvlii ja min skuvlafálaldahkii.
Buot bargit leat maid mielde Rabas beaivvi lágideamis.
Mii leat ilus go nu ollugat bohte deike Kárášjohkii ja sávvat ahte mii fas oaidnalit čakčat muhtin ohppiiguin geat ledje dáppe mannan vahkus ja ahte dalle leat sii min skuvlla oahppit.
Mis ledje maid gilvvut guosse ohppiide ja vuoitit leat Teryl Sofie ja Inger Sofie, Kárášjoga 9A-luohká oahppit ja Mihkku B, Deanu sámeskuvlla 10. luohká oahppi. Sii vuite guhtege T-báiddi mas lea min skuvlla logo.
Leavnnja 10B-oahppis, Christel, lei ges nu lihkku ja vuittii sámeniibbi.
Giitu buohkaide geat serve ja giitu galledeami ovddas.
Loga Rabas beaivi birra maid dáppe: Åpen dag i Karasjok